ఐక్యరాజ్యసమితి అంతర్జాతీయ సంతోష దినోత్సవం సందర్భంగా ఓ నివేదిక విడుదల చేసింది. ఈ నివేదిక ప్రకారం.. నివాసితుల అభిప్రాయం ఆధారంగా 140 కి పైగా దేశాలలో జీవన నాణ్యతను అంచనా వేస్తుంది. ఇందులో మ‌న స్థానం ఎక్క‌డుందో తెలుసా?
వరల్డ్ హ్యాపీనెస్ రిపోర్ట్ 2025 రిపోర్ట్ ప్రకారం.. ఫిన్లాండ్ వరుసగా ఎనిమిదో సంవత్సరం ప్రపంచంలోనే అత్యంత సంతోషకరమైన దేశంగా అగ్రస్థానంలో నిలిచింది. ఐక్యరాజ్యసమితి అంతర్జాతీయ సంతోష దినోత్సవం సందర్భంగా.. 147 దేశాల సంతోష స్థాయిలను నిర్ణయించడానికి సామాజిక మద్దతు, ఆరోగ్యం, స్వేచ్ఛ, దాతృత్వం, అవినీతి, అవగాహన, స్థూల జాతీయోత్పత్తి (GDP) వంటి వివిధ అంశాలను ఈ నివేదిక అంచనా వేసింది.
0 నుండి 10 స్కేల్ ఉపయోగించి వాటికి ర్యాంకింగ్ ఇవ్వ‌డం జ‌రిగింది. ఇందులో ఫిన్లాండ్ 7.74 సగటును సాధించి, ప్రపంచవ్యాప్తంగా అత్యంత సంతోషకరమైన దేశంగా తన స్థానాన్ని సుస్థిరం చేసుకుంది. ఫిన్లాండ్ తర్వాత డెన్మార్క్, ఐస్లాండ్, స్వీడన్, నెదర్లాండ్స్ ఉన్నాయి. బలమైన సామాజిక మద్దతు వ్యవస్థలు, ఉన్నత జీవన ప్రమాణాలు, పని-జీవిత సమతుల్యత కారణంగా ఈ దేశాలు సంతోష నివేదికలలో స్థిరంగా ఉన్నత స్థానంలో ఉన్నాయి. ఆసక్తికరంగా.. కోస్టా రికా, మెక్సికోలు టాప్ 10లో తొలిసారిగా నిలిచి 6వ, 10వ స్థానాలను దక్కించుకున్నాయి. మరోవైపు అమెరికా 24వ అత్యల్ప స్థానానికి పడిపోయింది. యునైటెడ్ కింగ్‌డమ్ 23వ స్థానంలో నిలిచింది.
టాప్ 10..
- ఫిన్లాండ్
- డెన్మార్క్
- ఐస్లాండ్
- స్వీడన్
- నెదర్లాండ్స్
- కోస్టా రికా
- నార్వే
- ఇజ్రాయెల్
- లక్సెంబర్గ్
- మెక్సికో
భారతదేశం ఎక్కడ..
తాజా వరల్డ్ హ్యాపీనెస్ రిపోర్ట్ 2025లో భారతదేశం తన సంతోష సూచీలో స్వల్ప మెరుగుదల సాధించింది. 2024లో 126వ స్థానంలో ఉన్న భార‌త్ ఈ సారి 118కి చేరుకుంది. అయితే ఈ ర్యాంకింగ్ ఇప్పటికీ ఉక్రెయిన్, మొజాంబిక్, ఇరాక్ దేశాల‌తో పోలిస్తే వెనుకే ఉంది. ఇక మ‌న పొరుగుదేశాలు.. నేపాల్ 92వ స్థానంలో, పాకిస్తాన్ 109వ స్థానంలో, చైనా 68వ స్థానంలో, శ్రీలంక- బంగ్లాదేశ్ వరుసగా 133- 134వ స్థానంలో నిలిచాయి.
సంతోషంగా లేని..
ప్రపంచంలోనే అత్యంత అసంతృప్తికరమైన దేశంగా ఆఫ్ఘనిస్తాన్ నిలిచింది. ఆఫ్ఘన్ మహిళలు ఎదుర్కొంటున్న ఇబ్బందులే ఆ దేశం దిగువ స్థానంలో ఉండడానికి ప్రధాన కారణం. వారి జీవితాలు మరింత కష్టతరంగా మారుతున్నాయని వారు నివేదించారు. ఆఫ్ఘాన్‌ తర్వాత సియెర్రా లియోన్, లెబనాన్ వరుసగా రెండవ, మూడవ అసంతృప్తికరమైన దేశాలుగా నిలిచాయి.