భారతదేశంలో చార్టర్డ్ అకౌంటెంట్ కావడం చిన్న విషయం కాదు. అందులోనూ 19 సంవత్సరాల వ‌య‌సులోనే ఆ ఘ‌న‌త సాధించి గిన్నిస్ రికార్డ్ సొంతం చేసుకుంది. ఆ అమ్మాయి గురించి ఈ ప్ర‌త్యేక క‌థ‌నం..
సీఏ.. ఇది దేశంలోని అత్యంత కఠినమైన పరీక్షలలో ఒకటి. దీనికి సాధారణంగా సంవత్సరాల తరబడి చ‌దువుతుంటారు. ఉత్తీర్ణత సాధించడానికి అనేక ప్రయత్నాలు అవసరం. అయితే మధ్యప్రదేశ్‌లోని మోరెనా పట్టణానికి చెందిన ఒక యువతి దానిని అధిగమించడమే కాకుండా 19 సంవత్సరాల వయసులో ప్రపంచంలోనే అతి పిన్న వయస్కురాలైన మహిళగా కూడా నిలిచింది. ఆమే.. నందినీ అగర్వాల్!
ఇన్‌స్టాగ్రామ్ ఖాతాలో 74,000 మందికి పైగా ఫాలోవర్లు ఉన్న నందిని అగర్వాల్ 2021లో అతి పిన్న వయస్కురాలైన మహిళా చార్టర్డ్ అకౌంటెంట్‌గా నిలిచి గిన్నిస్ వరల్డ్ రికార్డ్స్ ద్వారా గుర్తింపు పొందింది. ఈ విషయం ఆమె సోషల్ మీడియా ద్వారా తెలిసింది. అంతే కాదు.. అక్టోబర్ 18, 2001న జన్మించిన అగర్వాల్ 2021లో అతి పిన్న వయసులో సీఏ ప‌రీక్ష‌నే కాదు.. ఇండియా బుక్ ఆఫ్ రికార్డ్స్ ప్రకారం దేశవ్యాప్తంగా పరీక్షలో మొదటి స్థానాన్ని కూడా సాధించిన ఘ‌న‌త ఆమెకు ద‌క్కింది. “ఆమె జూలై 2021లో తన చివరి CA పరీక్షకు హాజరై 19 సంవత్సరాల, 8 నెలల, 18 రోజుల వయస్సులో 1వ ర్యాంక్‌ను సాధించింది. నవంబర్ 29, 2021న ధృవీకరించబడింది” అని ఇండియా బుక్ ఆఫ్ రికార్డ్స్ వెబ్‌సైట్ పేర్కొంది.
నేడు అగర్వాల్ అనేక హోదాలను ధరించారు. ఆమె ఒక CA, ప్రపంచవ్యాప్తంగా ఉన్న కొన్ని అతిపెద్ద కార్పొరేట్ కంపెనీలలో పనిచేసింది. తన ప్రయాణాన్ని పంచుకోవడానికి బహుళ వేదికల మీద తన మాట‌లు వినిపించేందు ఆహ్వానం అందుకుంది. వేలాది మంది అనుచరులతో కంటెంట్ సృష్టికర్తగా కూడా మారింది.
నందినీ.. “చార్టర్డ్ అకౌంటెంట్ (B.com తో) 19 సంవత్సరాల వయసులో CA ఫైనల్స్‌లో AIR 1, 16 సంవత్సరాల వయసులో CA ఇంటర్‌లో AIR 31 సాధించి జాతీయ రికార్డు సృష్టించా. నేను PwC తో ఆర్టికల్ ట్రైనీగా నా కార్పొరేట్ ప్రయాణాన్ని ప్రారంభించాను. వివిధ డైనమిక్ జట్లు, పని సంస్కృతులలో భాగమయ్యాను. చట్టబద్ధమైన ఆడిట్‌లు, గ్రూప్ రిపోర్టింగ్, రెఫర్డ్ రిపోర్టింగ్, IFRS అసైన్‌మెంట్‌లు, టాక్స్ ఆడిట్‌లు, ఫోరెన్సిక్ ఆడిట్‌లలో పనిచేసిన మూడు సంవత్సరాల అనుభవం నాకు ఉంది” అని చెప్పింది.
అగర్వాల్ బోస్టన్ కన్సల్టింగ్ గ్రూప్ (BCG)లో ఒకటిన్నర సంవత్సరాలు అసోసియేట్ మేనేజ్‌మెంట్ కన్సల్టెంట్‌గా పనిచేసింది. BCGలోని G20 బృందంలో కూడా భాగమని ఆమె లింక్డ్ఇన్ ద్వారా తెలుస్తున్న‌ది. ప్రస్తుతం ఆమె ప్రైవేట్ ఈక్విటీ విశ్లేషకురాలిగా పనిచేస్తున్న‌ది. ఆమెకు యూట్యూబ్‌లో రెండు లక్షలకు పైగా సబ్‌స్క్రైబర్లు ఉన్నారు. అక్కడ ఆమె క్రమం తప్పకుండా CA పరీక్షల గురించి వీడియోలు, అధ్యయన చిట్కాలను పంచుకుంటుంది.