నాకు నిద్రపట్టడం లేదు. మధ్యలో లేస్తే నిద్రపోవడం కష్టంగా ఉంది. చాలామంది నోటి నుంచి ఈ మాటలు వింటాం. మీరు కూడా ఇలా నిద్రకు సంబంధించి సమస్యలను ఎదుర్కుంటున్నారా? అయితే ఈ నియమాలు పాటించండి.
నిద్ర సరిగా పట్టడం లేదంటే మానసిక, శారీర సమస్యలు ఉండి ఉంటాయి. అలా కాదు మామూలుగా నిద్ర పట్టడం లేదంటే మాత్రం ఈ చిట్కాలు పాటించండి. అప్పటికీ నిద్ర పట్టకపోతే మాత్రం తప్పక వైద్యుడిని సంప్రదించాల్సిందే!
- నిద్రకోసం ఒక క్రమపద్ధతి అవలంబించాలి. మామూలు రోజుల్లోనే కాదు.. శని, ఆదివారాల్లో కూడా అదే సమయంలో మార్పు ఉండకూడదు. అప్పుడే నిద్ర క్రమం తప్పదు.
- నిద్ర వచ్చే సమయంలో మంచం మీదకు వెళ్లొద్దు. రాని నిద్ర కోసం మంచం మీద దొర్లడం చేయకూడదు.
- ఇరవై నిమిషాల తర్వాత కూడా నిద్ర రాకపోతే మంచం మీది నుంచి లేచి సోఫా లేదా కుర్చీలో తక్కువ కాంతిలో కూర్చొని ఏదైనా పుస్తకం చదువండి. ఆ సమయంలో ఫోన్ చూడడం, టీవీ చూడడం లాంటివి చేయొద్దు. ఇలా చేస్తే ఉన్ననిద్ర కూడా పోతుంది.
- కాఫీ, టీ, కూల్ డ్రింక్స్, చాక్లెట్స్, సిగరెట్లు కనీసం నిద్రకి ఆరుగంటల ముందు వరకు తీసుకోవడం ఆపేయాలి. అంటే దాదాపు సాయంత్రం 4 గంటల తర్వాత వీటిని తీసుకోకూడదు. అలాగే మద్యం కూడా నిద్ర స్వభావాన్ని దెబ్బతీస్తుంది.
- మంచం నిద్ర, మైథునం కోసమే. తద్వారా మంచానికి మనసుకి బంధం ఏర్పడుతుంది. మంచం పైన చదవడం, తినడం, ఫోను మాట్లాడడం, ల్యాప్ టాప్ తో పని చేయడం, సినిమా చూడడం ఇవన్నీ ఆ బంధాన్ని దెబ్బతీస్తాయి.
- పగటిపూట పాడుకోవద్దు. అది మీరు సాయంత్రానికి అలసిపోయేలా చేయదు. తద్వారా నిద్ర వాయిదాపడుతుంది. ఒకవేళ తప్పదు అనుకుంటే ఆ నిద్ర ఒక గంట లోపు ఉండేలా.. అది కూడా మధ్యాహ్నం మూడుకి ముందే నిద్రపోయి లేవాల్సి ఉంటుంది.
- నిద్రపోయే ముందు గోరువెచ్చని నీళ్లతో స్నానం, గోరువెచ్చని పాలు, చిన్నపాటి వ్యాయామాలు చేయొచ్చు. శ్రావ్యమైన సంగీతం, ఏదైనా పుస్తకం ఒక పద్దతిగా పెట్టుకొని ఆ పనులు చేయాల్సి ఉంటుంది.
- నిద్ర మధ్యలో సమయం చూడొద్దు. గడియారాలు, ఫోన్లు పక్కన పెట్టకుండా గది బయట ఉండేలా చూసుకోండి. ఇంతసేపు, అంతసేపు నిద్రపోవాలా? అంటూ మనసులో ఆందోళన చెందవద్దు.
- ప్రతిరోజూ లేచిన వెంటనే.. నిద్రపోయిన సమయం, లేచిన సమయం, నిద్రపోవడానికి ముందు ఏం చేస్తున్నారు వంటివి ఒక రెండు వారాలు రాసి పెట్టుకోండి. దీనివల్ల నిద్రక్రమం తెలుస్తుంది.
- సరైన ఆహారం తీసుకోవాలి. అది కూడా మితంగా. రాత్రిపూట అస్సలు కడుపు నిండా తినడం మానేయండి. ఒకవేళ తినాలనుకుంటే అది కూడా రాత్రి ఏడుగంటల వరకు మీ డిన్నర్ పూర్తి చేయాలి.
- అలాగే ఒకే దగ్గర నిద్రపోవడానికి ప్రయత్నించండి. మొత్తం చీకటిగా ఉండేలా చూసుకోండి. ఏసీ ఉష్ణోగ్రత ఒకే మాదిరిగా ఉండాలి. కొన్నిసార్లు కళ్ల గంతలు మంచి నిద్రకు సహాయపడుతాయి.
- ఒకవేళ రాత్రి నిద్ర సరిగా పట్టలేదంటే మీరు ఒత్తిడిలో ఉన్నట్లు! లేదా దైనందిన కార్యక్రమాలు సరిగా పాటించలేనట్లు. అలాగే ఉదయం చేసే వ్యాయామం నిద్రకి ఉత్తమం.